2. tölublað 2008
Ingibjörg E. Ingimarsdóttir, hjúkrunarfræðingur, á fyrstu grein þessa tölublaðs. Hún skrifar um hjúkrun gigtarsjúklinga á Íslandi. Í greininni fjallar hún um starfsvettvang gigtarhjúkrunarfræðinga hér á landi og í hverju hjúkrun þessa sjúklingahóps felst. Hún fer einnig yfir ýmsar hjúkrunarmeðferðir fyrir gigtarsjúklinga.
Hrefna Indriðadóttir, sjúkraþjálfari, skrifar grein um sjúkraþjálfun og gigt. Hún byrjar á að fjalla almennt um gigt og algengustu gigtarsjúkdómana. Meginviðfangsefnið er svo einstaklingsmiðuð sjúkraþjálfun. Hún fer yfir verki gigtarfólks, hreyfingu og val á þjálfun.
Guðbjörg Guðmundsdóttir, iðjuþjálfi GÍ, er með grein um iðjuþjálfun og gigt. Hún byrjar einnig á að fjalla almennt um gigt en færir sig svo yfir í liðvernd og handaæfingar, hjálpartæki og spelkunotkun gigtarsjúklinga.
Emil Thoroddsen, framkvæmdarstjóri GÍ, skrifar stutta grein um félagslegan og persónulegan kostnað við liðbólgur og gigtarsjúkdóma. Greinina vann hann upp úr skýrslu sem Norræna ráðherranefndin gaf út í ár, 2008. Dr. Stefán Ólafson, prófessor við HÍ vann þessa skýrslu fyrir Norræna gigtarráðið.
Guðbjörg Guðmundsdóttir, iðjuþjálfi Gí, Hrefna Indriðadóttir, sjúkraþjálfari GÍ og Helga Magnúsdóttir, verkefnisstjóri GÍ unnu saman að hagnýtum ráðum fyrir veturinn. Þær fjalla þar um hvernig gott er að búa sig fyrir veturinn og gefa góð ráð um hvernig hægt sé að auðvelda sér hina ýmsu hluti.