Sjúkraþjálfun Gigtarfélags Íslands

Sjúkraþjálfun GÍ er opin alla virka daga frá kl. 8.00 - 17.00

• Sími:        530 3609                    
• Faxið:              553 0765
• Netfang:         sjukrathjalfun@gigt.is

Við sjúkraþjálfun GÍ starfa:

• Hrefna Indriðadóttir, yfirsjúkraþjálfari
• Sólveig B. Hlöðvesdóttir, sjúkraþjálfari
• Vilborg Anna Hjaltalín, sjúkraþjálfari
• Antonio M. Grave, sjúkraþjálfari
• Rannveig Gunnlaugsdóttir, sjúkraþjálfari
• Styrmir Sigurðsson, sjúkraþjálfari 
• Þórunn Haraldsdóttir, sjúkraþjálfari                         

Aðstoðarmenn eru Bryndís Benediktsdóttir og Ragnhildur Guðbrandsdóttir. 

Markmið sjúkraþjálfunar

Markmið  sjúkraþjálfunar GÍ er að veita meðferð sem miðar að því að viðhalda og/eða auka heilbrigði gigtarfólks. Starf sjúkraþjálfara er einkum fólgið í greiningu og meðferð ýmissa sjúkdóma eða álagseinkenna, auk fræðslu um orsakir og afleiðingar þeirra. Þeir leiðbeina um hvernig megi bæta líðan og hindra að kvillinn taki sig upp eða gera áhrif hans á lífið sem minnst. Í sjúkraþjálfun er margskonar aðferðum beitt, s.s. æfingum og teygjum, togi, liðlosun, hita og kælingu, rafmagnsmeðferð, mjúkvefjameðferð, nálarstungum, ráðgjöf og fræðslu.

 Vitað er að gigtarsjúkdómar setja fólki margvíslegar skorður og oft tapast bæði þol og vöðvakraftur. Mikilvægt er að viðhalda og auka hreyfanleika og vöðvakraft, auk þess að minnka verki og bæta úthald. Í flestum tilfellum er hægt að minnka verki og bæta úthald gigtarfólks verulega með réttri þjálfun og meðferð.

 Algengasta sjúk­dóm­s­greining þeirra er sótt hafa sjúkraþjálfun GÍ er slitgigt, á eftir koma vefjagigt og ikt­sýki og síðan aðrir gigtarsjúkdómar. 

 Hvað þarf til að komast í sjúkraþjálfun

Til að komast í sjúkraþjálfun þarf beiðni frá lækni. Læknir sendir beiðn­ina til sjúkraþjálfara eða viðkomandi fer með hana á sjúkraþjálfunarstöð. Frumbeiðni felur í sér 25 meðferðir og gildir í hámark 12 mánuði óháð því hvenær viðkomandi hóf meðferð. Ef þörf er á meðferð umfram þann skiptafjölda þarf sjúkraþjálfari að senda meðferðaráætlun um það til tilvísandi læknis til samþykkis. Framhaldsmeðferð getur að hámarki orðið 25 skipti. Þurfi endurtekna framhaldsmeðferð (umfram 50 skipti) gilda reglur um langtímameðferð. Læknir eða sjúkraþjálfari geta sótt um langtímameðferð til TR. Eftir að beiðni rennur út tekur Tryggingastofnun ríkisins ekki lengur þátt í greiðslum fyrir meðferð.

Greiðsluþátttaka einstaklinga í sjúkraþjálfun

Heildartaxti sjúkraþjálfara er samkvæmt gildandi samningi þeirra við samninganefnd HTR. Tryggingastofnun ríkisins niður­­greiðir með­ferð að hluta, mismikið eftir aðstæðum.  Allir greiða aukagjald vegna upphafsskoðunar í samræmi við aðrar meðferðir.

 Almennir sjúklingar

Greiða 60% af gildandi taxta, af fyrstu 25 meðferðum, yfir 12 mánaða tímabil. Skoðunargjald er sama upphæð. Eftir 25 með­ferðir fá þeir þjálfunarkort sem gildir í 1 ár frá upphafsdegi meðferðar  og greiða þá 25% taxta, af hverri með­­ferð á meðan þjálfunarkortið er í gildi. Ef við­komandi er einnig í iðju­þjálfun (og / eða talþjálfun) eru þau skipti talin með.

 Elli- og örorkulífeyrisþegar með tekjutryggingu og börn og unglingar yngri en 18 ára

Greiða 20% af gildandi taxta, af fyrstu 20 meðferðum, yfir 12  mánaða tímabil. Skoðunargjald er sama upphæð.  Eftir 20 með­ferðir fá þeir þjálfunarkort sem gildir í eitt ár frá upphafsdegi með­ferðar og greiða ekkert á meðan þjálfunarkortið er í gildi. Ef viðkomandi er einnig í iðjuþjálfun (og / eða talþjálfun) eru þau skipti talin með.

 Elli- og örorkulífeyrisþegar án tekjutryggingar

Greiða 20% af gildandi taxta fyrir hverja meðferð.  Skoðunargjald er sama upphæð.

 Athugið eftirfarandi

• Örorkulífeyrisþegar eru beðnir um að framvísa örorkuskírteini sínu við skoðun svo að sjúkra­þjálfari geti tekið niður dagsetningar og númer þess.
• Athugið að sum verkalýðs- og stéttarfélög niðurgreiða sjúkraþjálfun félagsmanna sinna.
• Mikilvægt er að tilkynna forföll við fyrsta mögulega tækifæri.  Séu forföll ekki tilkynnt fyrir kl. 9.00 að morgni þess dags sem meðferð á að fara fram er innheimt forfallagjald. 

Til baka, Senda grein, Prenta greinina